Iztuetaren lan nagusiak banan-banan arakatu ondoren, azter dezagun orain honen euskara eta idazkera: Hasteko, esan behar iritzi nahiko kontrajarriak dauzkagula zaldibiarraren euskaraz eta estiloaz. Iztuetaren bizitza aski nahasia, korapilotsua izanik, makina bat puntu ilun eta eztabaidatu azaitzen zaizkigun bezala, bere obrari dagokionez ere bada hamaikatxo iritzi kontrajarri: Batzuk goi-goiko mailan eta eredutzat jartzen duten bitartean, zenbaitek, aldiz, ez dio aparteko baliorik aitortzen, eta bada idazle kaskar, gaiztotzat jotzen duenik ere.